കല്പ്പറ്റ: വയനാട്ടിലെ മുത്തങ്ങ, തോല്പെട്ടി ഇക്കോ ടൂറിസം കേന്ദ്രങ്ങളില് ഇന്നു മുതല് ഏപ്രില് 15 വരെ വിനോദസഞ്ചാരികള്ക്ക് പ്രവേശനം നിരോധിച്ചു. കര്ണാടക, തമിഴ്നാട് വനപ്രദേശങ്ങളില് നിന്നും വന്യജീവികള് തീറ്റയും വെള്ളവും തേടി വയനാടന് കാടുകളിലേക്ക് കൂട്ടത്തോടെ വരാന് തുടങ്ങിയ സാഹചര്യത്തിലാണ് ഈ നടപടി.
വന്യജീവിസങ്കേതത്തില് വരള്ച്ച അതി രൂക്ഷമായതിനാല് കാട്ടുതീ ഭീഷണിയും നിലനില്ക്കുന്നുണ്ട്. ഈ സമയത്ത് ഇക്കോ ടൂറിസം കേന്ദ്രങ്ങളിലെ വിനോദസഞ്ചാരം വന്യജീവികളുടെ സ്വൈരവിഹാരത്തിനു തടസ്സം സൃഷ്ടിക്കാനും വിനോദസഞ്ചാരികളുടെ സുരക്ഷിതത്വത്തിന് ഭീഷണിയുണ്ടാകാനും സാധ്യതയുണ്ടെന്നു വിലയിരുത്തിയാണു വിനോദസഞ്ചാരം താല്ക്കാലികമായി വിലക്കി പ്രിന്സിപ്പല് ചീഫ് ഫോറസ്റ്റ് കണ്സര്വേറ്റര് ഉത്തരവിട്ടത്.
